Женската ракометна репрезентација утревечер од 19 часот во спортската сала „Боро Чурлевски“ во Битола ќе го одигра реваншот од баражот во квалификациите за Светско првенство против Полска, а досега се продадени 80 отсто од билетите.
Нема дилеми дека салата ќе биде исполнета и дека избраничките на селекторот Кристијан Грчевски ќе имаат силна поддршка.
Продажбата на влезници се одвива онлајн (https://mktickets.mk ) и на сите продажни места на МК Тикетс низ Македонија. Цената е 100 денари, а средставата ќе бидат донирани за настраданите во Кочани.
РФМ ги мотивираше ракометарките со парична награда од 1,5 милиони денари ако се пласираат на СП. Првиот меч го доби Полска со 4 голови разлика (18-22).
Утрово на тренингот тимот беше посетен од градоначалникот на општина Битола, Тони Коњановски, кој им посака успех на ракометарките, и нагласи дека ова претставува голема чест за Битола што е домаќин на еден ваков значаен натпревар.
