Серхио Рамос и Лионел Меси веќе со години наназад се големи ривали на теренот. Шпанскиот дефанзивец мака мачи како да го сопре Меси во налетот да ѝ донесе победа на Барселона против Реал Мадрид. Многу често се случувало Рамос и многу поостро од тоа што е дозволено, да го фаулира Меси, па дури да влезат и во расправија. Сепак, кога се работи за квалитетите на Аргентинецот, капитенот на Реал Мадрид нема дилема.
На прашањето дали Диего Марадона е најдобриот играч кој некогаш играл за Аргентина, Рамос даде одговор што изненади многумина навивачи на Барселона.
„Го почитувам Марадона, но сигурно сите знаете дека тој е километри позади најдобриот аргентински фудбалер во историјата. За мене тоа е Лионел Меси“, одговори Рамос.
Рамос, кој е капитен и на шпанската репрезентација, моментно е со „црвената фурија“ во исчекување на утрешниот меч на гости кај Малта, во рамките од квалификациите за ЕП 2020 година. Во првиот дуел од квалификациите, Шпанија на свој терен се намачи, но со 2-1 успеа да ја победи Норвешка. Токму Рамос беше стрелец на победничкиот гол, и тоа од пенал.
