Реал Мадрид сериозно размислува да испрати понуда од 100 милиони фунти за шпанскиот ас Родри, пишуваат британските медиуми. Добитникот на Златната топка и еден од најдоминантните дефанзивни средни играчи во светот се најде на врвот на списокот на желби на новиот тренер Чаби Алонсо, кој инсистира на засилување на средниот ред со играч од врвна класа.
Интересот на мадридскиот гигант не е од вчера. Кралскиот клуб веќе некое време ја следи ситуацијата на Родри, а во меѓувреме беа разгледувани и други опции, како Анџело Штилер од Штутгарт. Според извори блиски до клубот, тренерот Чаби Алонсо имал несогласувања со управата токму околу селекцијата – тие биле подготвени да платат значајна сума, но исклучиво за фудбалер со врвни меѓународни квалитети.
Во таа насока, подготвувањето на голема понуда за Родри се смета за потврда дека Реал Мадрид сака да обезбеди токму таков профил на играч – искусен, докажан и способен веднаш да направи разлика.
Родри, кој минатата сезона пропушти значителен дел од натпреварите поради повреда на коленото здобиена во дуел со Арсенал, се врати на теренот на Светското клупско првенство, каде што одигра ограничен број минути. Неговото враќање на високо ниво сѐ уште е процес, но квалитетот и искуството не се доведуваат во прашање.
Иако веќе во неколку наврати бил поврзуван со трансфер во Реал, договорот со Манчестер сити му истекува во 2027 година. Доколку не го продолжи, следното лето ќе влезе во последната година од договорот, што значително ја намалува преговарачката моќ на англискиот клуб и ја отвора вратата за продажба.
