Реконструкцијата на тимот на Реал Мадрид нема да застане со трансферот на Еден Азар, тоа е јасно. Флорентино Перес има на ум уште неколку имиња со кои Кралевите би биле посилни во новата сезона, а меѓу нив е и младиот фудбалер на Бенфика, Жоао Феликс. Суперталентираниот португалски офанзивец само на 18 години блесна во дресот на лисабонските Орли и така си ја заработи етикетата „новиот Кристијано Роналдо“.
Само што за „новиот Роналдо“, Перес ќе треба доста да се намачи да го добие. Имено, Бенфика одби понуда од 80 милиони евра за својот дијамант. Во понудата имало и опција Феликс да остане на „Да Луз“ и наредната сезона како позајмен играч, па во 2020 година да истрча на „Сантијаго Бернабеу“. Раководството на португалскиот првак не отстапува од својот услов – За да го продадат Феликс, ќе треба да ја активираат неговата клаузула од 120 милиони евра.
И што е најважно, Реал има голема конкуренција за потписот на Феликс. Манчестер сити, Манчестер јунајтед, ПСЖ, Јувентус, сите чекаат на готовс и се обидуваат да ја придобијат новата фудбалска сензација, која, пак, без колебање одолева на сите досегашни понуди.
