Правилото што минатото лето го измени Меѓународниот одбор на фудбалските асоцијации, ИФАБ, беше клучно за елиминацијата на Манчестер јунајтед во ФА купот, по поразот на пенали од Мидлзбро.
Спорен беше моментот од 64. минута кога Данкан Вотмор играше со рака во шеснаесетникот на Манчестер јунајтед, но судијата Ентони Тејлор даде знак играта да продолжи, по што Мет Крукс израмни на 1:1.
Голот на Мидлзбро предизвика вистинска забуна кај љубителите на фудбалот, бидејќи асистентот за погодокот очигледно играше со рака, по смирувањето на топката која му се одби од ногата.
Изменетото правило во режија на ИФАБ дозволува играта да продолжи во таков случај, а голот при ненамерно играње со рака би бил поништен само ако Вотмор постигнеше гол.
Таква е интерпретацијата на ИФАБ, фудбалски одбор за кој малкумина и знаат дека постои во светот на фудбалот.
Судијата Тејлор го проверуваше спорниот момент и со помош на ВАР технологијата и добил инструкции од Стјуарт Атвел, кој беше главен во ВАР собата да го признае голот на Крукс.
Потоа следеше драма во пенал серијата од по 8 пенали, а од вкупно 16 удари од белата точка на двете екипи, промаши само Еланга и Црвените ѓаволи доживеаа сензационална елиминација во ФА купот.
