Поранешната ѕвезда на Барселона, Ривалдо смета дека каталонскиот клуб направил кикс што одлучи да го задржи Лионел Меси во своите редови и за оваа сезона. Според Бразилецот, Меси требало да си замине од клубот како што тоа го направи Реал Мадрид со Кристијано Роналдо. Португалскиот ас го напушти „Сантијаго Бернабеу“ и за трансфер вреден 100 милиони евра се пресели во Јувентус.
Ривалдо играше за Барселона во периодот од 1997 до 2002 година и не се погодија на теренот со Меси во ниту еден случај. Бразилецот е уверен дека кога фудбалерот изразил незадоволство и желба да си замине, тоа требало и да се случи.
„Голема грешка беше тоа што Меси го задржаа во клубот. Меси требаше да биде продаден додека уште е под договор, како што тоа го направи Реал Мадрид со Кристијано Роналдо. Мадриѓани го искористија моментот и заработија 100 милиони евра, а свртеа нова страница“, вели Ривалдо.
Барселона во моментов е во голема гинансиска криза, а долговите надминаа повеќе од една милијарда евра.
„Клубот мора да продава, тоа е јасно. За среќа има играчи кои се на цена како Гризман, Дембеле, Кутињо… Ова е уште една шанса за нов почеток. Нема да биде лесно, но тоа е неминовно“, додава некогашниот бразилски ас.
Ривалдо ја заврши кариерата во 2015 година, а во 1999 година успеа да ја освои Златната топка, додека со Бразил стана светски првак.
