Кристијано Роналдо е во центарот на вниманието откако синоќа речиси сам го одведе Јувентус во четвртфиналето на Лигата на шампионите. Португалецот даде хет-трик за победа од 3-0 на Јувентус, токму толку колку што беше потребно да се елиминира Атлетико Мадрид. Роналдо едноставно „леташе“ на теренот и беше незадржлив. Два гола даде со глава, а погодокот кој беше клучот за пат во четвртфиналето го постигна од пенал.
За Роналдо ова беше осми хет-трик во Лигата на шампионите и со тоа се израмни на врвот со Лионел Меси. Токму Меси вечерва ќе треба да покаже што знае на „Камп ноу“. Барселона го игра реваншот против Олимпик Лион. По првиот меч во Франција немаше погодоци, иако каталонскиот гигант упати над 25 удари кон голот на противникот.
Барселона едноставно вечерва мора да даде гол и да победи против Лион. Евентуално реми со погодоци ќе значи сензација на „Камп ноу“ и елиминација на фаворитот. Меси како и Роналдо се единствените играчи кои имаат над 100 постигнати погодоци во ЛШ. Роналдо синоќа беше во посакуваниот елемент и имаше посебна ноќ за паметење, а останува да видиме дали Меси ќе го следи неговото темпо и дали може Барселона да се надева на одлична игра на Меси и место во четвртфиналето од ЛШ.
Дека мечот во Барселона во многу нешта ќе зависи од Меси, знае и тренерот на Лион, Бруно Женесио.
„Ние ќе играме без притисок и ќе се обидеме да наметнеме наш стил на игра. Знаеме дека играме против една од најсилните екипи во светот, но и ние знаеме за што сме способни да направиме. Многу нешта ќе зависат од Лионел Меси. Правиме тактички план за тоа како максимално да го намалиме неговото влијание во играта. Треба да бидеме сконцентрирани од првиот момент до последната судиска свирка. Не верувам дека и овој меч може да заврши 0-0, што значи дека ќе мора да дадеме гол“, рече стратегот на Лион, Бруно Женесио.
