Антонио Ридигер си постигна смешен автогол во второто полувреме против Шефилд јунајтед, но сепак не го чинеше скапо својот тим Челзи, кој го победи фенерџијата во Премиер лигата со 2:1 на гостински терен.
Стоперот на гостите се обиде во 54-тата минута да му ја врати топката на голманот Менди, но двајцата не се разбраа, па Шефилд јунајтед во тој момент израмни на 1:1. Тој момент и автоголот на Ридигер можете да го погледнете ОВДЕ.
Претходно Мејсон Маунт со погодок во 43-тата минута му донесе предност на фаворитот, а победата ја осигури Жоржињо со погодок од пенал во 58-мата минута.
При двата гола на Челзи, клучен играч беше Тимо Вернер. Најпрво одлично му асистираше на Маунт за првиот погодок на мечот, а потоа над него голманот Рамсдејл направи фаул за пенал, што го реализираше Жоржињо.
Шефилд остана на последното место во Премиер лигата само со 11 бода, а Челзи е на делба на петтото место со Вест хем и двете екипи имаат по 39 бода.
