Прославениот италијански тренер, Ариго Саки, кој во минатото беше и технички директор на Реал Мадрид, смета дека лошите резултати на Кралскиот клуб сезонава не се по вина на Карло Анчелоти кој е единствен тренер со пет титули во Лигата на шампионите.
„Дали луѓето имаат поим кој е Анчелоти? Дали знаат што има освоено? Го сметам за вистински мајстор, не само поради неговите трофеи, туку и поради неговите човечки квалитети. Реал Мадрид треба да размисли два или три пати пред да се раздели со некој како Карлето“, смета Саки.
„Она што ме прави тажен, иако тоа е дел од фудбалот, е што сите го критикуваат и обвинуваат Карло за елиминацијата од Лигата на шампионите. Ајде да го погледнеме неговиот тим оваа сезона. Тој имаше многу повреди и беше принуден да игра многу натпревари без природен дефанзивец. Доведоа напаѓач од кој се очекуваше да биде феномен, но тој не играше како таков“, вели Саки.
Во интервјуто за „Ла Газета дело спорт“ тој ја искористи можноста да зборува и за своето искуство во клубот.
„Знам добро како работи Реал Мадрид. Флорентино Перез е одличен претседател, но тој премногу се фокусира на напаѓачите. Морав да се борам три месеци со него за да го убедам да го ангажира Серхио Рамос. Флорентино не обрнува внимание на дефанзивците“, открива Саки.
