Фудбалерите на Сасуоло на домашен терен го совладаа тимот на Верона со 2:1 во последниот натпревар од 11-тото коло од Серија А.
Работите започнаа лошо за Сасуоло бидејќи гостите поведоа уште во втората минута, кога Федерико Чекерини погоди по асистенција на Депаоли.
По почетниот шок, домашните фудблери успеаја да ги консолидираат редовите и да ја анулираат предноста на противникот до крајот на полувремето. Арманд Лориенте постигна фантастичен гол за израмнување во 32-рата минута. Лориенте лесно го мина противничкиот дефанзивец по левата страна и потоа со одличен шут во долниот лев агол на голманот погоди за 1:1.
Во вториот дел Сасуоло направи целосен пресврт по голот на Давиде Фратеси на петнаесетина минути пред крајот на натпреварот за конечни 2:1 и нови три бода. Сасуоло со победата се искачи на деветтото место на табелата со 15 бода, додека Верона е претпоследна само со пет освоени бода.
