Заврши зимскиот преоден рок во најквалитетните европски лиги. Време е за сумирање на реализираното и потенцирање на трансферите кои ќе останат запаматени како најзначајни. Допрва ќе се види што ќе им донесат тие на клубовите кои вложија огромни средства.
Вкупно 11 трансфери беа во вредност од 30 милиони евра или повеќе, а најскапиот трансфер беше оној на Џон Дуран, кој за 77 милиони евра ја напушти Астон вила и се пресели во Ал-Наср, каде што ќе игра со Кристијано Роналдо и со Садио Мане.
Меѓу десетте најголеми трансфери се најде уште еден премин во саудиската лига – трансферот на левото крило на Порто, Галено. Тој го напушти португалскиот гигант за 50 милиони евра.
Галено ќе го засили нападот во кој веќе играат Ријад Марез, Роберто Фирмино и Ајван Тони.
Манчестер сити беше клубот кој најмногу потроши оваа зима. Сезоната во која тимот на Пеп Гвардиола не доминира како во претходните, тој одлучи да ја освежи со неколку нови имиња.
Сити оваа зима направи четири од десетте најголеми трансфери.
Актуелниот англиски шампион како нова опција во нападот го донесе Омар Мармуш од Ајнтрахт за 75 милиони евра, а клубот го засили и со два многу млади стопери.
Деветнаесетгодишниот Витор Рејс пристигна од Палмеирас за 37 милиони евра, додека една година постариот Абдукодир Хусанов од Ленс беше платен 40 милиони евра.
Последниот ден од преодниот рок ја активираа откупната клаузула од 60 милиони евра за Нико Гонзалес, 23-годишен шпански играч за врска.
Оваа сезона постигна седум гола и асистираше уште за пет во 29 настапи.
Трите водечки екипи во Премиер лигата, Ливерпул, Арсенал и Нотингам форест, не купуваа, а најголемиот трансфер (освен тие на Сити) го направи Манчестер јунајтед, кој за 30 милиони евра го доведе Патрик Доргу од Лече.
Јунајтед одлучи да го испрати Ентони на позајмица во Бетис, а тој беше прогласен за играч на натпреварот на неговото деби во Шпанија.
Во Шпанија преодниот рок беше прилично мирен. Најголемиот трансфер беше оној на Акор Адамс, кој од Монпелје премина во Севилја за 5,5 милиони евра.
Атлетико, Барселона и Реал Мадрид, клубовите кои се борат за титулата во Ла Лига, не направија никакви потези на пазарот.
Ајнтрахт откако го продаде Мармуш, замена пронајде во Илеј Вахи од Марсеј и Миши Батшуаји.
Борусија Дортмунд последниот ден ги потврди трансферите на Карни Чуквуемека на позајмица од Челзи и голманот Дијант Рамај. Тој дојде од Ајакс, но ќе ја заврши сезоната на позајмица во Копенхаген.
Баерн доведе само голман, Јанис Урбиг од Келн, и го продолжи договорот на Мануел Нојер, додека Баер Леверкузен ги донесе Марио Хермосо и Емилијано Буендија на позајмица.
Третиот најголем трансфер го направи ПСЖ. Парижаните за 70 милиони евра ја купија грузиската ѕвезда Хвича Кварацхелија од Наполи, додека Рандал Коло Муани беше испратен на позајмица во Јувентус.
Тие исто така за 50 милиони евра го продадоа Чави Симонс на Лајпциг, што беше еден од 10-те најголеми трансфери оваа зима.
Монако за 13 милиони евра го купи напаѓачот Мика Биерет од Штурм, додека Лион направи две поголеми продажби.
Никола Залевски пристигна во Интер на позајмица од Рома и веднаш запиша асистенција на своето деби во миланското дерби.
Милан, пак, го купи Сантијаго Хименес од Феенорд за 32 милиони евра, а на позајмица ги доведе Кајл Вокер од Манчестер сити и Жоао Феликс од Челзи.
Алваро Мората беше испратен на позајмица во Галатасарај, а Лука Ромеро беше продаден во Крус Азул.
Јувентус, покрај позајмицата на Коло Муани, исто така го доведе Лојд Кели од Њукасл и Ренато Веига од Челзи.
Дополнително, го купија Алберто Кошта од Виторија Гимараиш речиси за 15 милиони евра.
Аталанта го донесе Даниеле Малдини за 10 милиони евра, додека Стефан Пош беше позајмен од Болоња. Николо Заниоло се пресели во Фиорентина.
Топ 10 најскапи трансфери оваа зима
Џон Дуран (Астон вила → Ал-Наср) – 77 милиони евра
Омар Мармуш (Ајнтрахт → Манчестер Сити) – 75 милиони евра
Хвича Кварацхелија (Наполи → ПСЖ) – 70 милиони евра
Галено (Порто → Ал Ахли) – 50 милиони евра
Чави Симонс (ПСЖ → Лајпциг) – 50 милиони евра
Абдукодир Хусанов (Ленс → Манчестер сити) – 40 милиони евра
Витор Рејс (Палмеирас → Манчестер сити) – 37 милиони евра
Нико Гонзалес (Порто → Манчестер сити) – 60 милиони евра
Сантијаго Хименес (Феенорд → Милан) – 32 милиони евра
Патрик Доргу (Лече → Манчестер јунајтед) – 30 милиони евра
