За одбојкарската репрезентација на Македонија остануваат уште два меча од квалификациите за пласман на Европското првенство во 2026 година, каде ќе патуваат најдобрите од секоја група, но и петте најдобри второпласирани.
Целта е во Атина да освоиме барем сет против јужниот сосед, а потоа против Грузија на домашен терен да го потврдиме пласманот на континенталниот собир, што ќе биде четврти по ред на нашите одбојкари.
„Дуелот со Грција е еден од најважните натпревари за нас летово. Одлично ја темпиравме формата, одигравме квалитетни пријателски дуели кои ни покажаа што е добро во нашата игра, а што треба да поправиме и работевме на тоа деновиве. Анализираме, поставуваме тактика и мислам дека во одлична форма влегуваме во утрешниот натпревар. Резултатите од останатите групи се во наша полза, и сега е се во наши раце. Потребен ни е минимум сет против Грција и мислам дека нема да го бараме минимумот, туку ќе одиме на максимум и зошто да не приредиме изненадување во Атина!? Големо е значењето на овој натпревар – пласман на ЕП и сите сме свесни за тоа. Мотивација и инспирација не ни недостасуваат, желбата е голема и може да очекуваме добра игра, па зошто да не и победа. Сите сме здрави, расположени, има убава атмосфера во тимот и верувам дека тоа ќе се преслика и во играта и на натпреварот.“ – вели Филип Савовски.
