Пред нешто повеќе од четири години Аргентинецот Марко Трунгелити одлучи да го крене гласот во борбата против наместените мечеви во тенисот. Тој се појави како главен сведок против тројца свои колеги кои беа обвинети за местенки.
За својата искреност, Марко доби презир од од другите играчи и стрес кој го наруши неговото здравје, но и формата во која беше. По долга пауза, Трунгелити реши да се врати на тенискиот терен и само го потврди тоа што го мисли, а тоа е дека „секој петти тениски меч е наместен“.
Најмногу се местело на турнирите на кои играат тенисери од понизок ранг, а тоа е затоа што оние тенисери кои не се во Топ 100 на АТП листата тешко може да опстојат со заработка од настапите. Аргентинскиот тенисер во изјава за „Ла Национал“ вели дека во минатото и на Новак Ѓоковиќ му било нудено да предаде натпревар за да заработи пари.
„Би сакал да мислам дека работите се промениле, но мислам дека нема многу сменето. Оние кои местат мечеви само се многу повнимателни од порано. Ме болеше што ме нарекуваа предавник. Знаев кој сум. Дури и Ѓоковиќ има речено дека му било понудено да намести натпревари“, вели Трунгелити кој денеска е на 236 место на АТП листата и се чувствува предадено од остантите тенисери.
