Актуелниот НХЛ-првак, тимот на Вашингтон капитолс и третпат сезонава издвојува победа против Каролина хурикејнс, овојпат со убедливи 4-1. Домаќините ја забележаа втората последователна победа и се на чекор до пласман во плејофот, а најзаслужен за славењето ноќеска беше Евгениј Кузнетсов, кој намести три од четирите гола на Капитолс.
Шампионот со дополнителни напори во третиот период стигна до победата, откако по 40 минути игра резултатот беше 1-1, а погодоците на Овечкин, Карлсон и Бексторм го осигурија 45-тиот овосезонски триумф.
Едмонтон ојлерс и ЛА кингс одново одиграа ефикасен меч во кој „паднаа“ повеќе од пет погодоци, а домаќините славеа со високи 8-4. Ретко се случува двајца играчи на еден тим во една пресметка да остварат хет-трик, а ноќеска тоа им успеа на Драјсајтл и Нуџент-Хопкинс.
„Нафташите“ се залетаа уште на стартот, па во првите 20 минути дури петпати се радуваа на погодок, иако Јафало донесе предност за гостите по две минути игра. Кингс се обидуваа да се вратат во игра, но на секој нивен гол, домаќините имаа одговор, а во завршната третина темпото се намали, па Драјсајтл почести со уште еден гол за конечни 8-4.
Резултати НХЛ: Колумбус блу џекетс – Њујорк ајлендерс 4-0, Вашингтон капитолс – Каролина хурикејнс 4-1, Монтреал канадиенс – Флорида пантерс 6-1, Отава сенаторс – Бафало сејберс 4-0, Едмонтон ојлерс – ЛА кингс 8-4, Аризона којотс – Чикаго блекхокс 1-0, Ванкувер канукс – Анахејм дакс 4-5.
