Репрезентацијата на Грција во септемврискиот прозорец одигра два квалификациски натпревари со половичен ефект од еден пораз на гости кај Холандија со 3-0 и домашна победа над Гибралтар од 5-0.
Токму дуелот против Гибралтар предизвика голем скандал во грчкиот фудбал бидејќи четворица фудбалери не настапија на овој дуел поради грешка на Фудбалскиот сојуз. Се работи за фудбалерите Цимикас, Манталос, Курбелис и Сиопис, коишто не играа на дуелот против Гибралтар наводно поради суспензија поради жолти картони.
Сите четворица имаат по два жолти картони и планот на селекторот Густаво Појет беше тие да ги исчистат картоните за да може да настапат на дуелите против Ирска и Холандија во октомврискиот прозорец, но во Грчкиот сојуз не знаеле дека се паузира со три, а не со два жолти картони.
Ваквата информација воопшто не му се допаднала на селекторот Појет, кој за ова дознал по мечот, а Грчкиот фудбалски сојуз сега е на удар на силни критики од нивната спортска јавност.
