Ракометарите на Монпелје славеа во реваншот од осминафиналето од Лигата на шампионите против Загреб со 30:24 и се пласираа во четвртфиналето, каде што ќе играат против Кил. Првиот меч кој се играше во Загреб заврши без победник 27:27.
Овој двомеч претставуваше и пресметка меѓу ракометарите кои во 2019 година ја освоија титулата во ЛШ со Вардар – Сташ Скубе, кој сега игра за Монпелје, и Иван Чупиќ и Тимур Дибиров, кои настапуваат за хрватскиот шампион.
Дресот на Загреб го носи уште еден поранешен Вардарец, Патрик Валчак, но тој не беше дел од шампионската генерација на Црвено-црните.
Одлучувачки момент кој го одлучи победникот беше од 42-рата до 50-тата минута, кога Монпелје даде четири гола по ред и за првпат поведе со пет гола предност (24:19), која знаеше да ја зачува до крајот.
Токму Скубе беше најдобар кај францускиот тим со шест гола, додека Чупиќ даде четири гола за Загреб.
Претходно, пласман во четвртфиналето обезбеди и Кјелце, кој и во реваншот го победи ГОГ Гудме, овојпат со 33:28 и со вкупни 66:53 си закажа двомеч со европскиот шампион Магдебург.
