Селекторот на Словенија, Матјаж Кек синоќа веднаш по мечот го призна поразот од Македонија. Кек потенцираше дека Македонија бил подобар противник и дека заслужено победи.
Македонија стигна до четвртата поведа во шестиот меч против Словенија, покажувајќи дека одлично играме против овој ривал. И покрај тоа што и традицијата, но и играта од синоќа е на страната на Македонија, Словенците се чувствуваат навредено од една изјава која ја пренесуваат на капитенот на Македонија Горан Пандев.
„Словенија го има Јосип Иличиќ, кој е одличен играч, но нема ништо друго. Остатокот од екипата не е ни близу да размислува да игра на европските првенства. Пред натпреварот реков дека Словенија не е ништо посебно и тоа се потврди.Во ред, тие го имаат Облак, не треба да разговараме за тоа, но голманот никогаш не однел никого некаде“, е изјавата на Пандев која ја пренесуваат словенечките медиуми, а ја оценија како остар напад на нивниот национален тим.
И дел од медиумите во регионот ја пренесуваат изјавата на Пандев, велеќи дека капитенот на Македонија бил многу искрен во тоа што го изјавил.
