Борха Валје постигна фантастичен гол од огромна далечина, со лоб удар од 60-на метри за Динамо Букурешт и го спаси гигантот од пораз против Ботошани.
Шпанецот забележа дека голманот на гостите Едуард Пап е излезен надвор од шеснаесетникот и успеа од далечина со прецизен удар да го лобува.
Со погодокот во 71. минута Борха ја анулира предноста на Ботошани од 37. минута, а на водечкиот гол на гостите му „кумуваше“ нашиот поранешен репрезентативец Стефан Ашковски. По неговиот удар со глава топката го погоди Исмаел Лопес во ногата и влезе во домашниот гол.
Ашковски играше до 67. минута, а со него како стартер за Ботошани во Букурешт против гигантот на романскиот фудбал играше и Давид Бабунски.
Ботошани со ремито 1:1 остана на врвот на табелата со 7 бода на три меча. Динамо е без победа со две ремија и еден пораз на стартот од новото првенство во Романија.
