Меѓународниот олимписки комитет (ИОК) најави дека на следните Летни олимписки игри што во 2024 година ќе се одржат во Париз, можно е да го нема еден од најстарите спортови, боксот.
Причината за ова се несогласувањата на ИОК со Меѓународната боксерска федерација (ИБА) поради што и беше одземена и организацијата на олимпискиот турнир на Игрите во Токио што се одржаа минатата година. ИОК изминатите години постојано ја предупредува ИБА за корупција и местенки и доколку во најбрзо време не се преземат конкретни чекори, тогаш боксот може да биде исфрлен од Игрите во Париз.
„ ИБА на конгресот што се одржа неодамна, уште еднаш покажа дека нема вистински интерес за боксот и боксерите, туку ја интересира само сопствената моќ“, стои во дел од соопштението на ИОК.
Ова е втор пат, во последните година дена како во ИОК гласно размислуваат да го исклучат боксот кој беше дел од програмата на античките Олимписки игри што се одржаа во 776 година пред нашата ера.
