Светската куќа на фудбалот, ФИФА, очигледно е неподготвена да се справи со големите инциденти што се случуваат на африканскиот континент во квалификациските натпревари за пласман на Мундијалот во Катар, а бизарен, но и опасен случај имаше во Антананариво во Мадагаскар.
Пред мечот меѓу домашната селекција и Танзанија, војска влегла во хотелот каде што биле сместени гостинските репрезентативци и со закана со оружје сакале да ги приведат.
Инцидентот е страшен, репрезентативците на Танзанија биле преплашени и стравувале и за своите животи, а наводно причината за упадот на војската на Мадагаскар е сомнежот дека кај гостите има заразени со ковид-19.
Мечот се одигра и немаше резултатско значење бидејќи и двете репрезентации се елиминирани од битката за настап на Светското првенство во Катар идната година.
Танзанија вложи жалба до ФИФА за односот на домаќините, а мечот заврши нерешено, 1:1.
Soldiers have invaded Tanzania team hotel in Antananarivo and stationed at players’ rooms corridor with guns ahead of World Cup Qualifiers match against hosts Madagascar. Soldiers claimed that there are Covid-19 cases in Tanzania team @FIFAWorldCup @CAF_Online pic.twitter.com/ajw18agCMl
— TFF TANZANIA (@Tanfootball) November 14, 2021
Претходно во овој квалификациски циклус и Мароко имаше многу проблеми, а во септември фудбалската експедиција едвај спаси жива глава во Гвинеа.
Таму имаше воен удар, па Мароканците беа извлекувани од хаосот како на филм. Некако успеаја да стигнат до аеродромот во Конакри и безбедно да се вратат дома.
