Поранешниот фудбалски судија, Мексиканецот Марко Родригес, стана тренер откако го презеде раководењето на стручниот штаб на шпанскиот третолигаш Саламанка.
Родригес е човекот кој во 2014 година имаше чест да води два натпревари од Мундијалот во Бразил, кои подоцна станаа историски. Прво, тој делеше правда на мечот Италија – Уругвај, на кој Луис Суарес го гризна Џорџо Кјелини, а потоа го судеше и историското уништување на домаќинот Бразил од страна на Германија, во полуфиналниот меч кој Панцерите го добија со неверојатни 7-1. Марко не го виде гризењето на Суарес и не му даде црвен картон, но ФИФА ја исправи неправдата и го суспендираше Уругваецот со забрана за настап од неколку месеци.
Сега Родригес е веќе поранешен судија и реши да се испроба во тренерскиот бизнис преземајќи ја Саламанка, која игра во шпанската Сегунда дивизија, втора група. Животна желба му е да биде селектор на Мексико. Како судија има три светски првенства, а ако некогаш со својата земја учествува на СП, тоа ќе биде единствен пример во историјата некој да бил и судија и селектор на Мундијал.
