Кога на 21 јануари 2019 година беше објавена вест за трагичната смрт на аргентинскиот фудбалер Емилијано Сала, кој од Нант требаше да прејде во Кардиф, а загина при пад на авион во каналот Ла Манш, фудбалскиот свет беше во шок, и се обедини во тагата по загубениот живот.
Оваа трагедија ја злоупотребија навивачите на Ница на вчерашниот меч со Сент Етјен, и тоа на грозен и морбиден начин. Ница испадна од Нант во купот на Франција, па навивачите решија да запеат песна која ги шокираше сите. Се чини дека човечката глупост нема граници.
„Тој е Аргентинец кој не знае баш добро да плива. Емилијано е од вода“ – скандираа фановите на Ница, во 9-тата минута од мечот, во „чест“ на Сала кој имаше дрес со број 9.
Инаку, фановите на Нант и Бордо (Сала играше и за овој клуб) на секој меч во деветта минута пејат: „Тој е Аргетинец кој никогаш не се откажува, Емилијано Сала, Емилијано Сала“.
Од Ница испратија соопштение, во кое остро го осудија однесувањето на дел од нивните навивачи, и повторија дека му даваат поддршка на семејството на Сала.
