Трката за големата награда на Русија, која ќе се вози во недела, во Сочи, може да биде еден од првите чекори на Себастијан Фетел кон намалување на бодовниот минус кој го има во однос на Луис Хамилтон. Пилотот на Ферари заостанува дури 40 бода, но историјата покажува дека не е сè загубено за Германецот.
Нема да биде лесно да се надомести заостанувањето, особено што Мерцедес засега не прави грешки како Ферари. Но, Фетел веќе има направено еден пресврт во кариерата, кога за шест трки, надомести минус од 29 поени против Фернандо Алонсо. Во ситуација кога победата се вредува со 25 поени, Германецот има теоретски шанси да го помине Хамилтон.
Во далечната 1964 година, Џон Суртис освои само еден поен на првите четири трки, па неговиот ривал Греем Хил направи голема разлика. На шест трки до крајот, Суртис имаше 14 бода помалку, но во текот на сезоната заостануваше и со 43 поени, па направи пресврт.
Друг пример на освоена титула по заостанување од 40 или повеќе поени е оној од 1976 година. Ники Лауда ја имаше титулата в раце, но се случи оној катастрофален инцидент кога Австриецот се запали и мораше да паузира. Тоа го искористи Џејмс Хант, кој ја освои титулата.
