Фудбалската репрезентација на Македонија за играчи до 21 година ги има последните подготовки пред утрешниот дуел против Ерменија, во квалификациите за пласман на Европското првенство. По првите две кола, Македонија е без бодови откако загуби прво на гости од Полска со 0:3, а потоа и од Италија (0:1) на дуелот одигран во Битола.
Ерменија не е селекција од врвен калибар, па токму овој меч треба да биде шанса Македонија да ги освои првите бодови во овој квалификациски циклус. Расположение и оптимизам има и меѓу фудбалерите.
„По тешкиот почеток и двa зaгубени меча против силните ривали Италија и Полска, сега можам да кажам дека имаме полесни и противници со кои може да се надигруваме. Иако ниту еден противник не е лесен, Ерменија е ривал против кого Македонија има реални шанси да одигра цврст и ефикасен натпревар и да дојдеме до прв позитивен резултат. За да се дојде до првите бодови, мора да влеземе максимално дисциплинирани во натпреварот. Важно е да не се дозволат лесни грешки и да се одржи концентрацијата до последниот свиреж“, вели репрезентативецот Димитар Трајков, кој на клупски план ги брани боите на Работнички.
