По Мароко и Камерун, вчера и Египет го заврши шампионатот на Афкон во осминафиналето по минималниот пораз од Јужна Африка. Претходно бранителот Камерун загуби од Нигерија, а пред два дена Мароканците беа лоши изведувачи на пенали против Бенин.
Овие три селекции пред стартот на нокаут фазата немаа примено гол. Фараоните со три победи и гол-разлика од 5-0, важеа за едни од фаворитите за освојување на пехарот, но домаќините потфрлија пред публиката во Каиро. Камерун запиша еден триумф од 2-0, а двапати ремизираше без голови, но вчера Орлите трипати го најдоа патот до нивната мрежа. Мароко како и Египет, имаше „три од три“ со гол-разлика од 3-0, но Бенин лесно ја затресе нивната мрежа пред да се игра пенал-рулетот.
Единствената репрезентација која уште не примила погодок во својата мрежа, а не го заврши своето учесто, е Алжир. Алжирците досега беа перфектни, трите победи ги остварија со минимални 1-0, а денес на патот до четвртфиналето им стои селекцијата на Гвинеја. Ќе биде доста интересно ако половина од фаворитите го завршат натпреварувањето уште во првата нокаут рунда.
Инаку, интересно поход има Бенин. Во нокаут фазата се пласираа како трета најдобро рангирана селекција од групата на третопласирани, групата Ф ја минаа со три ремија, а уште чекаат на победа во 90 минути, бидејќи пласманот во четвртфиналето го обезбедија по изведувањето на пенали против Мароко.
Освен дуелот меѓу Алжир и Гвинеја (21 часот), денес се игра уште еден дуел од нокаут фазата меѓу Мадагаскар и Демократската Република Конго (18 часот).
