За време на викендот, на Големата награда на Италија во специјалниот простор „Шумахер Лаунџ“ на патеката „Монца“ се одржа и аукција на која беа продадени многу вредни и значајни предмети кои се дел од историјата на Формула 1. Дел од приходите ќе бидат наменети за добротворни цели преку фондацијата „Продолжи да се бориш“.
Најголемо внимание на аукцијата предизвикаа колекција од скапоцени предмети поврзани со Михаел Шумахер. Највредниот експонат беше тркачки костум на Ферари од 2000 година.
Токму во таа сезона Шумахер ја освои својата прва титула со Ферари, а со овој успех, Германецот започна неверојатна серија од пет последователни шампионски титули. Доминацијата на Шумахер заврши во 2004 година, кога стигна до петата титула со Ферари, а вкупно седма за него во кариерата.
Костумот кој Шумахер го носеше на трката за Големата награда на Унгарија во 2000 година беше продаден на аукцијата за импресивни 95.650 евра.
Значителен дел од приходите ќе одат во фондацијата „Продолжи да се бориш“, која е поддржана од семејството на Шумахер. Покрај ова скапоцено парче облека, беа понудени и други ретки парчиња. Тркачкиот костум „бенетон“ што го носеше седумкратниот шампион во 1995 година беше продаден за 61.360 евра.
Реплика на кацига од Scuderia Ferrari RF1 од 2003 година со потпис на визирот на Шумахер достигна цена од 11.520 евра. Самата аукција се одржа во сосема новиот салон на Шумахер, кој за првпат се отвори во Монца оваа година. Просторот е посветен на познатиот возач и неговото наследство во Формула 1.
Аукцијата беше организирана од Driver Lounge во соработка со Bonhams, реномирана аукциска куќа. Основачот на Driver Lounge, Рич Соди, рече дека настанот ги надминал сите очекувања.
„Нашето партнерство со Bonhams е голем успех со распродадениот салон на Шумахер во Монца и преку онлајн аукцијата“, рече Соди.
Тој додаде дека е воодушевен што многу специјални предмети пронајдоа нови домови, а воедно собраа значителни средства за добротворни цели.
„Им се заблагодаруваме на сите учесници во аукцијата за нивната поддршка и со нетрпение го очекуваме враќањето на Driver Lounge на еден од претстојните викенди на Гран-при“, нагласи Соди.
