Игор Тудор ја одржа првата прес-конференција како тренер на Јувентус. Да потсетиме, Тудор официјално ја презеде клупата на италијанскиот гигант пред четири дена. Јувентус реши да го отпушти Тиjаго Мота поради серијата слаби резултати, а хрватскиот стручњак потпиша договор до летово со опција за продолжување на уште една сезона.
Тудор веќе беше на клупата на Јувентус, но како помошник на Пирло (од август 2020 до мај 2021 година), а последната работа на поранешниот централен бек на Јувентус беше во Лацио. Тој се раздели со римскиот клуб во јуни 2024 година, само по 11 натпревари.
„Најпрво, сакам да ги поздравам многуте познати лица кои повторно ги сретнав во Јувентус и да им се заблагодарам на раководството и на сите што решија да ми ја дадат довербата. Горд сум што сум тука, но најважно е што имам желба за работа. Свесни сме дека имаме малку време, но си ја знаеме целта и нема оправдувања – ова е голем предизвик.
Влаховиќ е одличен играч, тоа сум го кажал и претходно – но тоа не се само зборови, тоа се факти. Ги има сите квалитети на одличен играч, доаѓа од тежок период и веќе разговаравме за тоа. Сега сме посветени на работата, тој има голема желба и заедно со Коло Муани не само што можеме да играме заедно, туку можеме да направиме големи работи.
Кога играчот е талентиран, лесно му е да најде позиција. Видов дека сите момци беа разочарани од тоа што се случи, чувствуваа одговорност. Но, тие се желни да започнат одново, вклучувајќи ги Купмајнерс и Јилдиз – два исклучителни таленти со ретки карактеристики во денешниот фудбал. Мора да постигнуваат голови, а јас ќе им најдам позиции на теренот каде што ќе можат најмногу да придонесат.
Како тренер седам на клупата речиси 15 години и покажав дека одлуките ги носам со срце. Ако чувствувам дека некоја ситуација ме мотивира, живеам во сегашноста и тоа е тоа. Не би се променило многу дури и да имам десетгодишен договор – секој ден го давам максимумот“, рече Тудор на промоцијата.
Хрватскиот стратег додава дека Јувентус никогаш не греши во своите одлуки.
„Секогаш сум велел едно – Јувентус ги прави вистинските работи затоа што ги избира вистинските луѓе. Сето ова во комбинација со работната етика и понизноста со која тренираа шампионите. Добро се сеќавам на тоа – Јувентус значи желба да се даде сè од себе секој ден, во секоја ситуација“, додава Тудор.
