Тренерот на Јувентус, Игор Тудор, беше задоволен по победата со 2-0 над Парма на стартот од сезоната. Тој истакна дека е важно тимот да ја започне новата кампања со силен настап и дека ваквите победи не треба да се земаат „здраво за готово“.
„Видов многу позитивни работи. Ова беше тежок натпревар, не очекувавме Парма да игра толку повлечено. На полувреме им кажав на момците дека мора да продолжат да напаѓаат и дека порано или подоцна голот ќе дојде. Само требаше да не примиме погодок. Важно беше да ја започнеме сезоната со победа. Ваквите победи не треба да се сметаат како нешто сигурно, дека секогаш ќе победуваш дома против екипа која на хартија не е на исто ниво“, изјави Тудор.
„Сите што се појавија на теренот покажаа правилен пристап. Првите натпревари никогаш не се лесни бидејќи има многу непознати. Парма настапи со доста старомодна тактика. Ние не им дозволивме многу шанси, но Бремер спречи сигурен гол со својата блокада. Давид се движеше одлично во шеснаесетникот. Тој е редок талент и секогаш е многу сконцентриран“, дополни Хрватот.
Душан Влаховиќ влезе од клупата и го постигна вториот гол, а Тудор призна дека ако зависи од него, би сакал да го задржи српскиот напаѓач.
„Тој е многу концентриран. Сè уште е играч на Јувентус и го прави тоа што треба. Работи напорно на секој тренинг и ќе видиме што ќе се случи до крајот на трансферниот прозорец. Ќе разговараме со него и ќе видиме. Постигна важен гол. Ако ме прашате што ќе се случи, не знам. Имам свои гледишта, но директорите ќе ја донесат конечната одлука“, изјави Тудор.
