Германски „Билд“ објави интересна информација дека Томас Тухел е главен фаворит за нов селектор на Англија, ако Герет Саутгејт одлучи да се повлече од кормилото на Гордиот Албион.
Германецот има одлично реноме во светот на фудбалот, откако беше тренер на гигантите Борусија Дортмунд, ПСЖ и Челзи, а со тимот од Лондон ја освои и европската титула.
Сепак засега Саутгејт се уште е селектор на Англија, репрезентација која испана во четвртфиналето на Мундијалот во Катар по поразот од 1:2 од Франција.
Разврската околу тоа кој ќе биде селектор на Гордиот Албион во иднина е интересна и за нас, бидејќи Англија и Македонија се во иста квалификациска група за пласман на ЕП што ќе се игра во Германија во 2024 година.
Со Англичаните ќе играме на 19. јуни идната година на „Олд Трафорд“ во Манчестер, а на 20. ноември ќе ни бидат гости во Скопје во последниот меч од Ц групата за пат во Германија на ЕП.
