Ватерполо репрезентацијата на Унгарија обезбеди место во финалето на Светското првенство откако со 19:18 славеше над Србија во полуфиналната пресметка. Триумфот на Унгарија е сосема заслужен ако се знае дека доминираа и го контролираа резултатот во најголем дел од мечот. Сепак, на крајот беше драматично.
Во првата четвртина Унгарија водеше со 5:2, а потоа и со 6:3. Србија се врати во втората четвртина, кога негативата од 5:7 ја претворија во водство од 8:7. Тоа беше прво и последно водство на Србија. На полувреме резултатот беше 8:8.
На почетокот на третата четвртина беше 10:10, а потоа следуваше фуриозна игра на Унгарците и на крајот од третата четвртина имаа предност од 16:12. И покрај убедливото водство од четири гола во пресрет на последната четвртина, сепак имаше драма во финишот. Србите намалија на 17:18, но во клучниот напад Унгарија даде гол за 19:17 и ги сруши сите надежи на противникот да направи чудо.
Во финалето Унгарија ќе игра против Шпанија, која во неверојатно драматичен меч, дури по подобро изведување на пеналите ја победи Грција.
