Реал Мадрид го доби дербито против Валенсија, победувајќи со 2:0 на „Сантијаго Бернабеу“. Кралскиот клуб може да биде презадоволен што ги освои трите бода, бидејќи гостите едноставно како сами да се победија. Уште во осмата минута гостинскиот играч Даниел Вас си постигна автогол и донесе радост на домашните навивачи.
Во продолжение на мечот, Валенсија создаде неколку одлични шанси, но едноставно „лилјаците“ не знаеја како да ја затресат мрежата на Тибо Куртоа. За тоа како се постигнува гол Реал покажа во 83 минута. Валенсија беше во напад, но гостите ја загубија топката. Реал направи контра по која Бензема асистираше до Лукас, а овој погоди за 2:0 и стави крај на сите надежи дека Валенсија може да си замине непоразена од Мадрид.
Со оваа победа Реал стигна до 23 бодови и се искачи на петото место на табелата, додека Валенсија остана со 17 бодови, што е доволно за 13 позиција во моментов.
