Реал Мадрид и Барселона утревечер ќе играат во финалето на Суперкупот на Шпанија. Ова ќе биде втор „Ел Класико“ сезонава, откако еднаш играа во првенството. На тој меч одигран на „Сантијаго Бернабеу“ Барселона одигра фантастично и го победи Реал со 4:0.
Еден од главните играчи на Реал, Федерико Валверде вели дека Кралевите со нетрпение го очекуваат финалето од Суперкупот и најавуваат одмазда за поразот во првенството.
„Имаме голема желба за реванш по тие 0:4. Беше многу тешко да се спие по тој меч, едноставно не очекувавме таков пораз. Ќе се обидеме да одиграме најдобро што можеме и да победиме. Во претходните неколку месеци самодовербата не ни беше на највисоко ниво, но сега тоа е променето. Атакуваме на освојување на нов трофеј“, оптимистички најави Валверде.
