Силекс останува со максимален ефект по четири кола, откако во Гостивар го совлада Арсими со минимални 0-1. Стрелец за кратовци беше Мартин Мирчевски кој во 17-тата минута ја затресе мрежата по центаршутот на Рајков.
Иако на прв поглед изгледаше дека Мирчевски е во недозволена позиција, ВАР-технологијата потврди дека напаѓачот бил во дозволена линија – поточно 47,7 сантиметри зад последниот дефанзивец. Со тоа дилемите беа отстранети, а голот заслужено беше признат.
Силекс со оваа победа ја продолжи триумфалната серија и испраќа јасна порака дека ќе биде еден од најсериозните конкуренти за врвот оваа сезона.
