Челзи барем привремено се искачи на врвот на табелата во Премиер лигата, откако со 2:0 славеше над Фулам, во првиот меч од третото коло. Со овој триумф Челзи стигна до седум бодови, додека Фулам остана на само два бода од три средби.
Лондонското дерби го одбележа ВАР технологијата, која „кумуваше“ на конечниот резултат. Во 21 минута Фулам постигна гол, но радоста на гостите траеше кратко. Од ВАР собата го повикаа главниот судија да погледне еден спорен момент. Еден фудбалер на Фулам ненамерно го назгази Чалобе, а играчот на Челзи се пожали на повреда. Арбитарот оцени дека тума имало елементи за фаул во напад, па голот на Фулам беше поништен.
Челзи поведе со голот на Жоао Педро и тоа во 45+9 минута. Беше покажано дека ќе има осум минути надополнување на првиот дел, а Челзи даде гол една минута подоцна. Гостите веднаш реагираа зошто судијата дозволил да се изведе корнерот, сметајќи дека требало да биде отсвирен крај на полувремето.
Во вториот дел, Челзи стигна до 2:0 благодарение на пеналот во 56 минута. Повторно ВАР системот реагираше дека еден играч на Фулам играл со рака, па беше досудена најстрога казна во корист на Челзи. Сигурен реализатор беше Фернандес.
