Ракометниот клуб Вардар наскоро ќе се пресели во реновираната сала „Расадник“ во скопска Кисела Вода, сала која беше сведок на успесите на Црвено-црните минатиот век, пред да се преселат најпрво во „Кале“, а потоа и во „Јане Сандански“.
Раководството на актуелниот лидер во Супер лигата и двократен европски шампион ќе прави трофејна сала во „Расадник“, па ги повика навивачите да учествуваат во креирањето, но и во зачувувањето на историјата на клубот.
„Со оваа иницијатива сакаме да ги собереме и да ги зачуваме оригиналните дресови со кои Вардар настапувал низ годините. Дел од нив веќе се наоѓаат во сопственост на клубот, но нашата желба е да ја комплетираме колекцијата и да обезбедиме што повеќе оригинални и добро сочувани дресови од различни периоди.
Секој дрес носи своја приказна. Тој е дел од некој натпревар, победа, генерација и емоција што го граделе Вардар како клуб. Затоа сакаме сите тие моменти да ги обединиме на едно место и да ги зачуваме за идните генерации.
Ги повикуваме сите навивачи и симпатизери кои поседуваат вакви дресови, а се во добра состојба и со позната сезона од која потекнуваат, доколку сакаат да ги донираат, да нè контактираат. Секој дрес ќе биде прегледан од клубот и ќе биде прифатен доколку недостасува во колекцијата или е во подобра состојба од постоечкиот.
Како благодарност, клубот ќе обезбеди:
– нов дрес или комплет
– сезонски билет
– VIP пристап во салата
– средба со тимот
– организирана тура низ салата и средба со ракометарите.
Ова е можност секој навивач да стане дел од историјата на Вардар и да остави свој белег во клубот“, се вели во повикот од РК Вардар.
