Најтрофејниот клуб во СЕХА, регионалната ракометна лига, Вардар утревечер, во „Јане Сандански“ ја започнува одбраната на титулата, и тоа против екипата на Пекинг Спортски Универзитет од Пекинг. Вардарци се актуелни бранители на трофејот во СЕХА-лигата. Освен Пекинг, во група со европскиот првак се уште и: Мотор, Нексе, Татран и Војводина. Во другата група ќе играат: Еурофарм Работник, Мешков Брест, Веспрем, Загреб, Металопластика и Спартак Москва.
Тренерот на Вардар, Давид Писонеро, вели дека Вардар очекува победа против кинескиот ривал.
„Среќен сум што почнува официјалниот дел од сезоната и што ќе биде во Скопје. Пекинг Универзитет е непознат тим. Сепак, по Супер Глоуб, за нас е важно да го кренеме нивото и да почнеме да играме сè подобро. За играчите е добро да почнат во добар ритам и без разлика што ова е непознат ривал, наше е да одиграме најдобро што можеме и се надевам дека како што ќе одминува времето, ќе бидеме сè подобри”, изјави тренерот на Вардарци, Давид Писонеро.
За почетокот на сезоната, Вардар нема да може да смета на Стојанче Стоилов и Жозе Толедо, кои се повредени. Во екипата се врати и Глеб Калараш, кој ќе ја засили одбраната.
СЕХА-лигата започнува вечерва, со дуелот меѓу Војводина и Нексе.
