Во престижниот аудиториум „Џовани Арведи“ во Музејот на виолини во Кремона, англискиот напаѓач Џејми Варди, кој е нов играч на италијанскиот прволигаш Кремонезе, го даде своето прво интервју, раскажувајќи што го поттикнало да ја прифати понудата и да направи ваков изненадувачки трансфер.
„Ова место е навистина неверојатно, ме импресионираа виолини кои датираат од седумнаесеттиот век и изгледаат како штотуку да излегле од работилницата. И открив дека мора да свирите еднаш неделно за да ги одржите жиците во добра состојба. Сите се многу гостопримливи. Цело семејство е возбудено, особено моите деца, кои едвај чекаат да откријат нови стадиони и да учат нов јазик“, вели Варди за првите впечатоци.
Менаџерот на Челзи, Енцо Мареска, му раскажал што го чека во Италија и помогнал во одлуката на Варди да се пресели во Кремонезе.
Варди е свесен дека главна цел на тимот е да избори опстанок, а ако може и да направи подобри резултати од очекувањата.
„Прво мора да го обезбедиме нашиот опстанок, а потоа, од позиција на аутсајдери можеме да размислиме за нешто повеќе. Оваа ситуација ме потсети на времето кога со Лестер влегов во Премиер лигата. Тоа е уште една причина што ме натера да го прифатам овој проект и да му помогнам на тимот колку што е можно повеќе. Секогаш ќе дадам 100%“, рече Варди.
