Џордан Верету знае да погодува и со глава и со нога, а францускиот интеренационалец беше расположен за голови и со два прецизни удари беше најзаслужен за победата на Рома од 3:0 против Удинезе.
Погодок за домаќините постигна и Педро во финишот на мечот, со што само ја потврди убедливата победа на Волчицата.
Гостите пристигнаа во Рим со многу оптимизам и без примен гол на последните три натпревари, но брзо им се растури планот за подвиг.
Верету погоди со глава во петтата минута и најави дека Рома ќе ја продолжи трката за Скудетото, што го нема освоено цели две децении, или од сезоната 2000/01.
Истиот играч беше прецизен од белата точка во 25. минута. Домаќините постигнаа уште еден во првото полувреме, но беше поништен поради офсајд.
И финишот на мечот мина во знакот на Рома, а Педро со гол во судиското продолжение стави печат на убедливиот триумф на домашниот тим.
Рома се проби на третото место со 43 бода, шест помалку од лидерот Милан и четири помалку од Интер.
