Бразилски медиуми објавија дека Винисиус ќе биде освојувач на наградата The Best (најдобар) за фудбалер на годината во изборот на ФИФА.
Наводно Вини добил најмногу гласови и вечерва во Доха, Катар, ќе биде прогласен за играч на годината (се земаа предвид игри во периодот од август 2023 до август 2024).
ФИФА во 1991 година почна да ги прогласува најдобрите, во гласањето се вклучени капитените и селекторите на сите светски репрезентации, плус новинари и навивачи.
Ова ќе биде десетти пат во иста година да има различен победник во изборот на „Франс фудбал“, кој од 1956 година ја доделува Златната топка, и на ФИФА. Од 2010 до 2015, Златната топка и ФИФА заедно го прогласуваа најдобриот, а потоа пак се разделија. Во 70 проценти од случаите (17 години од 26) имало ист победник на Златна топка и ФИФА.
Вини, кој игра за Реал Мадрид, ќе биде шестиот Бразилец по Ромарио, Роналдо, Ривалдо, Роналдињо и Кака кој бил играч на годината. Тој беше втор во гласањето за Златната топка (таму гласаат само новинари) зад Шпанецот Родри.
