Додека најголемиот дел од спортистите се подготвуваа за славје на новогодишната ноќ, во фудбалското првенство на Боливија планот беше сосема поинаков. Синоќа се играше последното 26-то коло од шампионатот, а дури три екипи беа во трка за титулата.
Олвејс реди (Секогаш подготвени) беше тимот кој како лидер влезе во последното коло со 48 бодови, а веднаш зад него беа Стронгест (Најсилните) со 47 бодови и тимот на Боливар со 46 бодови. Секогаш подготвените беа во пол позиција и на крајот тоа им се исплатеше.
На гостувањето кај Насионал Потоси, лидерот победи со 2:0 и на тој начин остана на челната позиција, а фудбалерите на крајот, покрај радоста за Новата година, се радуваа и на шампионскиот пехар.
Стронгест залудно победи на гостувањето кај Блуминг со 3:1 кога повторно остана еден бод зад шампионот, а на три бода се радуваше и Боливар по победата од 4:1 над Оријенте Петролеро, но славниот боливиски клуб остана на трето место на крајот од првенството.
