Фудбалската федерација на Македонија, односно Дисциплинската комисија одлучи да ја изрече најстрогата казна за екипата на Воска и да ја казни со одземање девет бода. Причина за казната е прекинатиот меч против Вардар, кога фудбалерите на охридскиот прволигаш се повлекоа од теренот и не го доиграа мечот.
Суспензија од две години заработи и претседателот на клубот, Нефи Усеини, поради наговарање, односно повикување на екипата да го напушти теренот. Иста казна, од две години, заработи и тренерот од Албанија, Клодијан Арбри, додека капитенот Агон Хани е суспендиран на еден месец.
Со оваа одлука Воска останува на последната позиција во Првата лига, но сега со 13 бода и само со теоретски шанси за опстанок.
Во продолжение одлуката на Дисциплинската комисија на ФФМ:
ФК Воска Спорт АД се казнува со одземање 9 (девет) бода од вкупниот број освоени бодови во тековната натпреварувачка сезона од Првата МФЛ и парична казна од 2.500,00 евра поради напуштање на натпреварот со ФК Вардар АД во рамките на 28-мото коло од Првата МФЛ;
ФК Воска Спорт АД се казнува со парична казна во износ од 5.000,00 евра поради слаба организација на натпреварот со ФК Вардар АД од 28-мото коло во Првата МФЛ;
Нефи Усеини – претседател на ФК Воска Спорт АД се казнува со забрана на вршење на функција во траење од 2 (две) години и парична казна во износ од 1.500,00 евра. Дисциплинската мерка е изречена поради наговарање, односно повикување за повлекување на екипата на ФК Воска Спорт АД на натпреварот против ФК Вардар АД од 28-мото коло во Првата МФЛ;
Тренерот на ФК Воска Спорт АД, Арбри Клодијан е казнет со 2 (две) години забрана за вршење функција, додека капитенот на ФК Воска Спорт АД, Агон Хани доби казна – забрана за настап 1 (еден) месец;
