ПСЖ има удобни 2-0 против Реал Мадрид по првите 45 минути од дербито кое се игра на „Паркот на принцовите“. Анхел ди Марија е виновникот што Кралевите се во незавидна ситуација, неговите два гола засега ја прават бучавата во Париз.
Аргентинецот рано ја отвори средбата по одличната акција на играчите на Томас Тухел, а во 33-тата минута го зголеми водството на домаќините со мајсторски погодок од околу 20 метри. Веќе во следниот напад Реал се закани преку Бејл, Велшанецот успеа да го насамари Навас, но неговиот гол не беше регуларен поради играње со рака.
Динамо Загреб има убедливи 3-0 против Аталанта на „Максимир“ благодарение на Леовац и двата гола на Орсиќ. Манчестер сити води со 2-0 по првото полувреме на гостувањето кај Шахтар во Доњецк со погодоците на Марез и Гундоган.
Кингсли Коман донесе минимална предност за Баерн Минхен против Црвена ѕвезда во 34-тата минута, додека Баер Леверкузен е во негатива од 1-2 против Локомотив Москва.
Само на дуелот меѓу Атлетико Мадрид и Јувентус нема погодоци во првиот дел.
