Уште неколку часа нè делат од првиот меч на нашата ракометна репрезентација, која првиот натпревар на Европското првенство ќе го игра против Словенија.
Момците на Кире Лазаров од 18:00 часот ќе истрчаат на паркетот во салата во Дебрецин, со што и официјално ќе го означат стартот на патешествијата на овогодишниот континентален шампионат.
Словенија е фаворит на хартија и тука нема дилеми, но ракометот нема да биде интересен спорт ако секогаш победуваат фаворитите.
Ако се погледне стартот на нашата селекција на ЕП, ќе се забележи нешто навистина интересно.
Македонија е во серија од две едноподруго победи. Првата беше токму над Словенија на ЕП во Хрватска, каде што славевме со 25:24, а завршивме први во групата и поминавме во следната фаза.
Пред две години, пак, нашата селекција славеше исто така минимално (26:25) против Украина, но не ја минавме групната фаза бидејќи завршивме трети.
Ако се погледне севкупно, Македонија на стартот на ЕП има учинок од три порази, едно реми, а во моментов сме во серија од две победи, која се надеваме дека ќе биде продолжена.
РЕЗУЛТАТИ НА МАКЕДОНИЈА ВО ПРВИТЕ МЕЧЕВИ НА ДОСЕГАШНИТЕ НАСТАПИ НА ЕП
ЕП 1998 во Италија: Унгарија – Македонија 29:20
ЕП 2012 во Србија: Шведска – Македонија 26:26
ЕП 2014 во Данска: Данска – Македонија 29:21
ЕП 2016 во Полска: Франција – Македонија 30:23
ЕП 2018 во Хрватска: Македонија – Словенија 25:24
ЕП 2020 во Австрија: Македонија – Украина 26:25
