Машката кадетска репрезентација на Македонија која настапува на Светското првенство до 19 години во Хрватска денеска игра против Унгарија во разигрувањето за пласман од деветтото до 12-тото место.
Победа на избраниците на селекторот Раде Стојановиќ ги носи во меч за пласман на деветтата позиција со подобриот од дуелот меѓу Чешка и Саудиска Арабија, а со евентуален пораз ќе играат за 11-тото место со поразениот од истиот дуел.
Натпреварот ќе се игра во Копривница од 20 часот, а според квотите, фаворит е Унгарија, но кадетите, кои како награда за минатогодинешниот триумф на ЕХФ шампионатот играат на СП до 19 години, покажаа дека се подготвени за големи дела.
Доживеаја само два пораза, од фаворитите Норвешка (27:25) и од Данска (37:30), а ги победија Црна Гора (29:20), Грузија (27:21) и Австрија (29:22).
