Атлетико Мадрид синоќа загуби на гостувањето кај Бетис со 0-1, но тренерот Диего Симеоне не е многу разочаран. Симеоне вели дека е среќен што Барселона конечно успеала да киксира и да не победи. Каталонскиот гигант на свој терен одигра 2-2 против Валенсија и освои само еден бод, па мадриѓаните сега заостануваат шест бодови зад лидерот.
И покрај оваа разлика, Симеоне верува дека Атлетико може да стигне до титулата, но мора Барселона почесто да губи бодови.
„Оптимист сум и фала му на Господ што Барселона не избега многу далеку од нас. Добро е што и тие загубија бодови во ова коло. Првенството е долго и ние ќе продолжиме да се бориме за титулата. Штета што ние не победивме против Бетис, но тоа е наша грешка. Од самиот почеток тргнавме многу офанзивно, но Бетис одигра еден од најдобрите мечеви во првенството и за тоа заслужуваат пофалби“, вели Симеоне.
