Менаџерот на Арсенал, Микел Артета, потврди дека капитенот на тимот, Мартин Одегард, се здобил со потешка повреда.
Норвежанецот се повреди за време на последните репрезентативни настапи, а ситуацијата веднаш не изгледаше охрабрувачки.
„Снимките покажаа дека има оштетување, особено на еден од лигаментите во коленото. Ова е сериозно. Ќе го загубиме на одреден период“, изјави Артета.
Отсуството на главниот креативец, кој е од клучна важност за Арсенал, беше забележливо во последниот натпревар против Тотенхем, а ќе се почувствува уште повеќе на дебито против Манчестер сити в недела.
