Ракометарите на Вардар 1961 и ослабени без Лазаревски, Борозан и Еспиња, освоија бод на гостувањето кај Валур на Исланд, откако одиграа 34-34 во дуел од Европската лига. Вардар веќе нема шанси за пласман во следната фаза, а им останува уште еден меч, дома со силниот германски тим Мелсунген.
Вардарци бодот го освоија благодарение на гол од седмерец во последна секунда.
Мечот беше неизвесен. Вардар првпат поведе во 41-ва минута, кога беше 24-23, а во првото полувреме Валур имаше предност од пет гола разлика.
Со серија од 3-0, Црвено-црните дојдоа до 33-32 во 58-ма минута што беше второ нивно водство во текот на средбата која мораа да ја добијат за да останат со шанси за пласман во нокаут фазата. Исланѓаните одговорија со серија од 2-0, а во последна секунда Срдановиќ реализираше пенал за 34-34.
Герогиевски, Срдановиќ и Маргели со по 5 гола беа најефикасни во македонскиот тим, а Гогов имаше 7 одбрани.
