Елиф Елмас експресно се вклопи во таборот на вицешампионот на Италија, Наполи, а на тренингот се пошегува со соиграчите и им ја „минираше“ победничката фотографија.
На трениг играчите на Наполи играат турнир по шест играчи, а победник е тимот што го предводеше Мертенс. Елмас не беше во победничката екипа, но со насмевка успеа да им се приклучи при фотографирањето и да им ја „расипе“ славеничката фотографија, што предизвика насмевки кај сите во таборот на наполитанците.
„Ова се победниците на турнирот. Игнорирајте го расипувачот на забавата, Елиф Елмас“, на шеговит начин ја објаснија ситуацијата на официјалниот сајт на Наполи.
Елиф летово од Фенербахче се пресели во Наполи за рекорден трансфер од 19 милиони евра, кога станува збор за македонски фудбалер.
И веќе добива одлична минутажа од Карло Анчелоти, а на пријателските дуели покажа дека ќе биде големо засилување. Играше одлично против Барселона на двата пријателски дуели, па се очекува да биде стандарден во составот на вицешампионот на Италија.
Серија А почнува следниот викенд, а Наполи во сабота ќе го игра премиерниот меч во Фиренца против Фиорентина.
