Аријан Адеми на натпреварот против Истра 1961 стана седми фудбалер во историјата на Динамо Загреб со 300 настапи на официјални натпревари. Македонскиот репрезентативец со 17 пехари е најтрофеен играч во историјата на Динамо, а до крајот на сезонава има шанса да стане и трети на вечната листа на играчи по број на настапи во дресот на загрепскиот клуб.
Утре Динамо му гостува на Осиек, а Адеми ако игра, ќе се изедначи со Златко Крањчар и Драгутин Вабец со по 301 настап за Динамо. Среќко Богдан има 304, а Марко Млинариќ 307. Сезонава Адеми не може да ги стигне само Младен Рамљак, кој има 337, и рекордерот Дражен Ладиќ, со 468 настапи.
Адеми, кој ја носи капитенската лента на Динамо, во клубот дојде во летото 2010 година, прв тренер му беше Велимир Зајец и ако не беа кратката позајмица во Локомотива во пролетта 2012 година и двегодишната суспензија поради допинг, тој веќе ќе беше втор по бројот на одиграни мечеви за Динамо. Ако се гледаат само натпреварите во европските купови, Адеми е рекордер на Динамо со 84 меѓународни мечеви.
