Капитенот на Динамо Загреб, македонскиот фудбалски репрезентативец Аријан Адеми, во интервју за клупската интернет-страница на хрватскиот првак изрази незадоволство од односот на навивачите кои исвиркуваат одредени играчи и тренерот, а тимот четири месеци нема пораз.
Динамо синоќа го елиминира бугарски Лудогорец и дојде на чекор од нов пласман во групната фаза во Лигата на шампионите.
„Некои луѓе не се свесни за големината на успехот. Во континуитет сме во групите на европските натпреварувања, тоа го крева хрватскиот клупски коефициент. Среќни сме што ќе имаме уште една европска есен. Желба ни е да бидеме во ЛШ, тоа е најелитно натпреварување, но и Лигата ан Европа е силна. Неспорно е дека против Бодо ќе мора да дадеме максимум, Норвежаните се квалитетен тим, и тие сакаат во ЛШ. Се надевам дека сите ќе имаат разбирање и ќе ни даваат поддршка“, изјави Адеми.
Адеми бара поддршка од навивачите и медиумите.
„Четири месеци сме без пораз. Ни треба поддршка, а не обратно. Заслужуваме објективен пристап и поддршка. Секој тим може да игра уште подобро, така и ние, но не е реално да се биде совршен во секоја минута од секој меч. Јас знам колку се трудиме, од што се имаме откажано за успесите на Динамо. Затоа би им порачал на навивачите кои свират да размислат дали се во право. Кога се бориме за нешто големо како сега, заслужуваме поддршка, не свирежи“, вели Адеми, кој веќе 11 години е во Динамо.
